01.31.10
Otsailean zer?
Ez da izango eskaintza oparoa ez dugulako. Ikusi, irakurri eta hautatu zer egin nahi duzuen astiro-astiro euskaraz bizitzeko!!! Otsailean eta Santurtzin euskaraz!!!
01.18.10
Xaboi ekologikoa egiteko tailerra
Berbalagunok ipurterre samarrak garela ezin uka. Beti ibiltzen gora eta behera bazter guztiak nahasten: mendian, poteoan, bertsotan, yogan… Eta oraingoan tailer eder bat antolatu dugu: Xaboi Ekologikoa egiteko tailerra. Urtarrilaren 22 eta 25ean 18:30etik aurrera Kultur Etxean gure arbasoek egin bezala xaboia ekoizten hasiko gara taldeka, lasai eta alai. EHNE sindikatuak aukera paregabe hau eskaini digu eta guk ezin izan diogu tentazioari eutsi!!
Hortaz, gai ekologikoak erabiliz gure eskuek lanari ekingo diote. Batek daki!! Krisi garai honetan dirua aurrezteko modu bat izan daiteke, eta begi-bistakoa denez, beti da aberasgarria gauza berriak ikastea. Areago, eskuekin eginez gero!!! Gehienez 15 partaide egon daitezke eta izena emateko jarri harremanetan gurekin azken eguna urtarrilaren 21a izango da. Kontuan hartu bi saioetara joan behar dela.
01.01.10
ZORIONAK ETA URTE BARRI ON DANORI!!!
Urte barri, txarri belarri, dekonak eztekonari, nik ez dekot eta niri, ezpabere mailutxu beteaz agiñek kiskiti klauski ♫!!!
♪♪♪ Herri hau sortzen segi dezagun euskaratik ta euskaraz!!! ♪♪♪♪♪
IZAN ZORIONTSU ETA EUSKARAZ BIZI!!! MUSUUUUUUAK!!!
12.23.09
KEN ZAZPI Santurtzin
KEN ZAZPI talde bizkaitarrak Santurtzin joko du larunbatean, abenduak 26, 21:30ean Serantes Kultur Aretoan, Santurtziko Udal Euskara Sailak eta BAI ESAN euskara elkartea kidea duen TOPAGUNEAk (Euskal Herriko euskara elkarteen federazioa bera) antolatuta, UDAGOIENEKO OSTERA kultur zirkuitoak 10 URTE betetzen dituela eta.
Eta BAI ESAN elkarteak 5 sarrera ditu bazkideen artean zozketatzeko, interesa duzuenok jar zaitezte harremanetan gurekin lehenbailehen: baiesan@kaixo.com.
Sarrera: aurretik 12€ (kutxazainetan), bertan 15€
Ken Zazpi Urte bira barria hasteagaz batera, talde bizkaitarra Santurtziko Serantes Kultur Aretora dator entzuleriari omena eskaintzeko asmoagaz. 7 urte kanta sarkorrak; lelo distiratsuak eta mezu konprometiduak sortzen. 7 urte ilusino bizigarri eta gogotsuak zabaltzen. Arrakastarik arrakasta, euskal talde handienen artean kokatu da.
EÑAUT ELORRIETA (ahotsa eta gitarra), BEÑAT SERNA (gitarra), IGOR ARTZANEGI (baxua), JON FRESKO (bateria), IÑAKI ZABALETA (teklatua)
12.22.09
Berbalaguna izan eta kredituak lortu EHUn!
AEKren mintzapraktika egitasmoetan (berbalagun, mintzalagun…) parte hartzen duten Euskal Herriko Unibertsitateko ikasleek aukera askeko kredituak eskuratu ahal izango dituzte. Adostutakoa honakoa da:
- Unibertsitateko ikasleen zeregina: mintzapraktika egitasmoan dauden euskaldun berriekin astean ordu batez elkartzea eta euskara ikasleak ikas-prozesua amaitzen laguntzea. Egitasmo hauek mintzataldeetan antolatzen da, unibertsitateko ikasleak bertan integratuko lirateke eta laguntzaile papera beteko lukete. Orotara 45 ordu, hau da, 3 kreditu
- Euskal Herriko Unibertsitateak parte hartzen duten ikasleei euren espediente akademikoko aukera askeko kredituak lortzeko aukera emango lizkieke..
- AEKren Praktika Zerbitzua berriz, ikasle horien jarraipena eta ebaluazio txostena egiteaz arduratuko litzateke.
Izena eman edo informazio gehiago nahi izanez gero, bete fitxa hau eta zurekin jarriko gara harremanetan.
12.18.09
EGUNKARIA LIBRE! MANIFESTAZIO NAZIONALA
Euskaldunon Egunkaria euskaraz geneukan bakarra zelako, euskararen aurkako erasorik ez dugulako nahi, gure hizkuntza bizirik nahi dugulako, euskal kultura libre nahi dugulako, adierazpen askatasunean sinisten dugulako, euskaraz idatzi, irakurri eta pentsatzea delitua ez delako, pentsaerari mugarik jarri ezin zaiolako. Honengatik guztiagatik, eta INOLAKO ZALANTZARIK GABE ERRUGABEAK DIREN AUZIPETUEI (Joan Mari Torrealdai, Martxelo Otamendi, Iñaki Uria, Txema Auzmendi eta Xabier Oleagari, besteak beste) GURE ERABATEKO ELKARTASUNA ADIERAZTEKO, abenduaren 19an, larunbata, Aita Donostia enparantzatik hasita, 17:00etan, manifestazio erraldoia egingo da Bilboko kaleetan hau aldarrikatuz: Egunkaria libre!! Berbalagunokin etorri nahi baduzu 16:20an Santurtziko tren geltokian lotuko gara.
12.15.09
EGUNKARIA LIBRE!!!
munduan libre
bizi ahal izateko
EGUNKARIA
libre munduan
bizi ahal izateko
12.04.09
Euskara elkarteak behar zaitu!
Kaixo, lagun hori!
Gutun honen bidez Bai Esan elkartearen berri eman, eta bide batez, laguntza eskatu nahi dizugu.
Bai Esan 2005eko udazkenean hasi zen elkartzen euskararen norma-lizazioan lanean ari zen hainbat elkartetako lagun batzuek bultzatuta (herriko ikastetxeak, kultur etxea, AEK, udal euskaltegia, eta Euskal Herrian Euskaraz). Guztion helburua berbera zen: Santurtzin euskararen presentzia areagotzea eta erabilera sustatzea.
Santurtzin dagoen arazoa Euskal Herri ia osoan dagoen arazo bera da; hots, euskararen ezagutzaren eta erabileraren arteko desoreka. Amildegia are handiagoa da euskal hiztunen ehunekoa urria den herrietan, Santurtzi eta Ezkerralde osoa kasu. Hemen euskararen presentzia oraindik testimoniala da eguneroko bizitzan.
Handia eta estimagarria da ikastolak, eskolek eta euskaltegiek egindako lana, baina horrek ez du eragozten euskararen presentzia erreala ia hutsaren hurrengoa izatea. Hala adierazten dute azken urteetan eginiko ikerketek.
Egoera honi erantzun bat eman nahian jaio zen Bai Esan. 2006ko azaroaren 21ean eman genuen ezagutzera geure burua herritarren aurrean Kresalan antolatu genuen ekitaldian. Hantxe, aretoa beterik, eta Andoni Egaña eta Unai Iturriaga bertsolariak lagun genituela, adierazi genituen gure asmo eta helburuak:
-euskararen egoera gure herrian normalizatzeko ahaleginean laguntzea
-honetarako, euskararentzako erabilera-esparruak irabazi
-maiztasun jakin batekin, kultura ekitaldiak antolatu herritar guztiei zuzenduta.
Aurten, besteak beste, honako hauek antolatu ditugu: hitzaldiak, ipuin kontalaria, euskarazko film laburren zirkuitua, antzerkia, bertso-afariak, Irakurri, gozatu eta oparitu kanpaina. Baina gure proiekturik garrantzitsuena eta harrerarik beroena izan duena Berbalagun programa da. AEKrekin batera bultzatu dugun programa horren helburua herriko auzo euskaldunak harremanetan ipintzea da mintzataldeak sortzeko eta, horrela, gure hizkuntza kalera, zinera, mendira… atera, gure eguneroko errealitatean bizirik izateko.
Baina orain laguntza behar dugu, eta horregatik jotzen dugu zugana. Laguntzeko bi modu proposatzen dizugu:
-ostegunero Santurtziko AEKko lokaletan biltzen gara. Taldean parte hartu nahi baduzu, hortik agertu besterik ez duzu.
-emandako diru-laguntzak ez dira nahikoak lan guztia aurrera eraman ahal izateko. Esan gabe doa, guk musu-truk lan egiten dugula (batzuetan geure poltsikoetatik ere aurreratu behar izan dugu dirua). Horregatik, Bai Esaneko bazkidea izatea eskatu nahi dizugu.
Kuotaren zenbatekoa ez da oso handia:
· Arrunta: 30 euro urtekoa, epe batean edo bitan ordainduta
· 15 euro gazte edo langabetuentzat
Bazkidearen txartela izateak abantaila batzuk emango dizkizu, hala nola, antolatzen ditugun ekitaldietan eta euskarazko produktuetan ere deskontuak izatea; baita beste herrietako elkarteek antolatutakoetan ere.
Euskararen aldeko lan erraldoi honetan behar zaitugu, animatu eta bazkidetu!
Gurekin harremanetan jartzeko: baiesan@kaixo.com
Kanta-kantari poz-pozik!
Originala gaurko ekitaldia! Eskerrik asko Ainhoa Ansa aranotarrari, Jagoba Astiazaran zestoarrari eta etorri zareten guztioi! 
Hor ibili gara 60 bat lagun poz-pozik kanta-kantari. Ahots apartak dauzkagu herrian, gero! Zur eta lur utzi gaituzue batzuok! Eta harrituta geratu da gidari izan dugun bikotea, santurtziarrok zenbat euskal kanta dakizkigun ikusita. Gutxienez bi poto -bertan egon zinetenok ulertuko duzue- egin zituzten! A zer-nolako giroa! Ezin hobea Euskararen Nazioarteko Eguna ospatzeko eta Mikel Laboari gorazarre egiteko!
Argazkiak laster hemen!
11.27.09
Euskararen Nazioarteko Egunean: santurtziarrok kantari
Abenduaren 3a, osteguna, Euskararen Nazioarteko Eguna santurtziarrok kantari emango dugu, Mikel Laboa gogoan dugularik, berak horrela gogoratzea nahiko luke eta. Asteartean, abenduak 1, gure artetik joan zela urtebete izango da eta egin diezaiokegun omenaldirik onena dela uste dugu. Zatoz zeu ere!
Lagunen artean abestea gustuko duzu? Bada, orduan ezin duzu galdu hurrengo ekitaldia. Originala eta berria izango da, zinez: Piano bat bertsotan. Oraingoan zeu ere protagonista izango zara, zeuk aukeratuko dituzu abestiak eta. Zeintzuk kanta abestu nahi dituzun pentsatzen hasi, eta zatoz gurekin! Ostegunean, abenduak 3, arratsaldeko 8etan Kresala aretoan, Santurtziko Bai Esan euskara elkarteari eta Udal Kultura Sailari esker. Ez huts egin!
Bertsolaritzan bezala, musikarekin ere inprobisatu daiteke. Bertsolaritzan bezala, gai jartzailerik ere izango da, kasu honetan pubilkoa bera. Ikuskizuna ikustera doanak entzun nahi duen euskal kantaren izena jarriko du papertxoan. Musikariek zozketa bidez ateratzen den papertxoan jartzen duen kanta jo beharko dute. Horrela publikoak garbi ikusi ahal izango du musikariak (Ainhoa Ansa: ahotsa eta gitarra , Jagoba Astiazaran : pianoa) inprobisatzen ari direla, eta beraiek erabakiko dute une oro zer entzun.
Aldi berean, ordenagailuan euskal kanten hitzak izango ditugu sartuak, irteten den kanta irteten dela, pantaila baten bidez, publikoak abestu dezan. Publikoak ikuskizunean aktiboki parte hartzea da helburuetako bat beraz, pasiboki ikustera joan beharrean. Publikoa ezinbestekoa da, bera baita ikuskizunaren programa erabakiko duena, eta era berean, abestuaz ikuskizuneko parte sentituko dena.
Hauez gainera, beste hainbat helburu ditu “Piano bat bertsotan” ikuskizunak. Batetik euskal kantagintza bultzatzea, eta historikoki Euskal Herriak kantatzeko izan duen zaletasuna berpiztea, egun pixkanaka galtzen ari baita. Era berean, memorian gordeta ditugun kanta zaharrak nahiz berriagoak azaleratzea eta berriz entzun ahal izatea. Zer esanik ez, kanten bidez, euskara eta bere kultura sustatzearena.
